جبیں میری ہے اُنؐ کا نقشِ پا ہے

جبیں میری ہے اُنؐ کا نقشِ پا ہے

یہی تو بندگی کی انتہا ہے



درِ سرکارؐ کا جو بھی گدا ہے

غنی ہے صاحبِ جُود و سخا ہے



تہی دامن جو آیا در پہ سائل

سخی بن کر یہاں سے وہ گیا ہے



درُودوں کی، سلاموں کی ہمیشہ

فرازِ عرش سے آتی صدا ہے



بجھے گی پیاس اب تشنہ لبوں کی

نبیؐ کے فیض کی چھائی گھٹا ہے



مرے سر پر ہے اُنؐ کا دستِ شفقت

کرم اُنؐ کا ہے یہ اُنؐ کی عطا ہے



خُدا کی حمد کا، نعتِ نبیؐ کا

ظفرؔ! اُسلُوب تیرا دِل کشا ہے

jabeen meri hai Un saww ka naqsh e paa hai

.